21 Jul Fekoor elkarteak Bilbon elkarretaratu da RENFEri aldirietako geltokietako irisgarritasuna eskatzeko
50 pertsona inguru bat egin dute ostiral honetan, uztailak 21, FEKOOR elkarteak (Gutxitasun Fisikoa edo Organikoa duten Pertsonen Bizkaiko Federazio Koordinatzailea) Bilboko Plaza Biribileko iturriaren aurrean goizeko hamaiketan RENFE Aldiriei geltoki guztietako irisgarritasuna eskatzeko deitutako elkarretaratzean.
RENFE Aldiriak ez gaitu hurbiltzen lelopean, Fekoor elkarteko zuzendari Javier Gilek gaitzetsi du gaur egun «Bizkaiko auzo, herri eta hirietako gune askok ez dutela garraiobide irisgarririk».
Datu gisa, hark zehaztu du Bizkaiko trenbide-sarearen inguruan bizi diren 120.000 pertsona inguru «garraio inklusiborik gabe bizi direla, Fekoor elkarteak horiek eskatzen urteak eman arren, RENFEk duela bost urte Maria Luisa Goikoetxea Urduñako bizilagunarekin proba pilotua egin arren eta Gobernuak otsailean Senatuan konpromiso berria adierazi arren».
Bizkaiko 44 geltokietatik 16 baino ez dira irisgarriak. Gainera, mugikortasun-, komunikazio-, ikusmen- edo entzumen-arazoak dituzten 10.000 pertsonak baino gehiagok «ezin izan dute eta epe laburrean ezin izango dute RENFE Aldiriak erabili lurralde historiko horretan, ez baitago inolako tren irisgarririk eta ez baita beren sarbidea errazteko beste sistema alternatiborik erabiltzen».
Horregatik, Fekoor elkartetik «eskatzen dugu epe laburrean beharrezko neurriak hartzea, herri eta auzoetako biztanle guztiei zerbitzua emango dien trenbide-sare irisgarri bat izateko, haien egoera fisikoa, psikikoa edo sentsoriala edozein dela ere», adierazi du Javier Gilek.
«Hauteskunde-promesak buka daitezela, propaganda hutsa baitira; konponbideak berehala nahi ditugu», gaineratu du.