02 Feb FEKOORrek baloratzen du zazpi patologia berri erretiro aurreratuan sartzea
Fekoorrek balorazio oso positiboa egiten du Batzorde Teknikoak emandako behin betiko aldeko txostenaz, %45eko edo hortik gorako desgaitasun-maila duten pertsona langileen erretiro aurreratuaren prozeduran zazpi patologia berri sartzeko, 1851/2009 Errege Dekretuan ezarritakoaren esparruan.
Aurrerapen honek garrantzi sozial handiko lorpena dakar, eta azken urteotan egindako lan jarraituaren emaitza da: eragin politikoa, koordinazio teknikoa eta mugimendu asoziatiboaren ahalegin kolektiboa uztartuz, estatu mailan Cocemfek gidatuta. Lan horri esker, eskubide honetara batu daitezkeen patologien zerrenda zabaltzea bultzatu da, eta gaixotasun jakin batzuei lotutako bizi-itxaropenaren murrizketa egiaztatzen duen ebidentzia zientifiko zorrotza aurkeztu da, Gobernuak onartutako prozedurak eskatzen duen bezala.
Behin betiko aldeko txostena jaso duten patologiak honako hauek dira: bizkarrezur bifidoa, Parkinsonen gaixotasuna, 1. motako distrofia miotonikoa (Steinert), Huntingtonen gaixotasuna, esklerosi sistemikoa, transtiretina-aldakorraren ondoriozko amiloidosia eta giltzurrun-gaixotasun kronikoa (G5 estadioa).
Fekoorren ustez, urrats honek berresten du desgaitasuna duten pertsonen erakundeen, patologia bakoitza ordezkatzen duten elkarteen eta arlo zientifikoaren arteko lankidetza dela bide egokia eskubideen benetako aitortzan aurrera egiteko eta desgaitasuna duten pertsonen bizi-baldintzak hobetzeko.
Zuhurtziarako eta informazio-argitasunerako deia
Hala ere, Bizkaiko erakundeak azpimarratu nahi du zuhurtziaz jardutzea eta informazio argia eskaintzea funtsezkoa dela, oraindik bete ezin diren itxaropen faltsuak sortzea saihesteko. Izan ere, behin betiko aldeko txostenak ez du esan nahi oraingoz patologia horiek automatikoki 1851/2009 Errege Dekretuaren eranskinean sartzen direnik; hori ezinbesteko urratsa da patologia horiek dituzten pertsonek erretiro aurreratua eskatu ahal izateko.
ISM/444/2025 Aginduak ezartzen duen bezala, prozedurak honako urrats hauek jasotzen ditu: Batzorde Teknikoaren txostenaren ondoren, Gizarte Segurantzaren Antolamendurako Zuzendaritza Nagusiaren ebazpen administratiboa. Ebazpena aldekoa bada, dagokion arau-aldaketa sustatu beharko da eta Estatuko Aldizkari Ofizialean argitaratu. Une horretatik aurrera baino ezingo da eskubidea modu eraginkorrean baliatu.
Testuinguru honetan, Cocemfek eta Fekoorrek Inklusio, Gizarte Segurantza eta Migrazio Ministerioari eskatzen diote izapideak ahalik eta azkarren amaitzeko, aurrerapen hau lehenbailehen lege-baldintzak betetzen dituzten pertsonentzat eskubide erreal eta eraginkor bihur dadin.
Era berean, bi erakundeek berresten dute lanean jarraituko dutela, etorkizunean beste patologia batzuk ere —bizi-itxaropenaren murrizketari buruzko ebidentzia zientifiko nahikoa dutenak— erretiro aurreratuaren prozeduran sartu ahal izan daitezen.