Lanberri programaren barruko prestakuntzak ziurtagiri ofiziala, 345 prestakuntza-ordu eta enpresetan 80 orduko praktikak eskaintzen ditu. Izen-ematea urriaren 4ra arte egongo da zabalik. Fekoorrek Garbiketa Profesionala + ECO doako ikastaro berria jarriko du martxan 2026ko urriaren 5etik 2027ko urtarrilaren 28ra. Prestakuntza lehentasunez langabezian dauden eta desgaitasun fisikoa eta/edo organikoa duten pertsonei zuzenduta dago. Ekimena Bizkaiko Foru Aldundiko Enplegua, Gizarte Kohesioa eta Berdintasuna Sustatzeko Sailak bultzatutako Lanberri programaren barruan garatuko da, Fondo Formación Euskadiren laguntzarekin. Ikastaroak 345 orduko iraupena izango du eta SSCM0108 Eraikin eta lokaletako gainazalak eta altzariak garbitzea profesionaltasun-ziurtagiria lortzeko aukera emango du. Ziurtagiriak balio ofiziala du Estatu osoan. Prestakuntzak ikuspegi ekologiko eta jasangarria izango du, bai hondakinen tratamenduan, bai garbiketa-produktuen erabileran. Ibilbideak enpresetan 80 orduko praktikak ere barne hartzen ditu. Horrez gain, banakako eta taldeko orientazioa, genero-berdintasunari buruzko prestakuntza, gizarte-trebetasunak eta sektoreko enpresekin lan-bitartekaritza eskainiko dira. Helburua pertsona bakoitzari hurbileko laguntza ematea eta kalitatezko enplegu-aukera jasangarriak sortzea da.

Informazio praktikoa

Datak: 2026ko urriaren 5etik 2027ko urtarrilaren 28ra.

Ordutegia: astelehenetik ostiralera, 09:00etatik 14:00etara.

Tokia: Fondo Formación Euskadi, San Vicente errepidea 10. km-a, 48510 Trapagaran.

Plazak: 14.

Prezioa: doan.

Baldintzak: % 33ko edo gehiagoko desgaitasun aitortua edo ezintasun iraunkor osoa izatea, eta Bizkaian erroldatuta egotea.

Izen-ematea: urriaren 4ra arte.

Harremanetarako: 944 753 059 / 944 758 202.

Interesa duten pertsonek pedro.delatorre@fekoor.com edo silvia.fernandezdelasheras@fekoor.com helbideetara ere idatz dezakete. Lanbideko ikastaro-kodea 26480619 da.