Fekoorrek, aurtengo urtarriletik ekainera, desgaitasuna duten 46 pertsona (23 emakume eta 23 gizon) laneratzea lortu du enpresa arruntean, 2023 urte osoan sustatu zituen ehun kontratazioen ia erdia.

Lan gehienak zerbitzuen sektorekoak dira: garbiketa, zerbitzu-laguntzaileak, atezaintza, gidariak, merkataritza, harreragileak eta teleoperadoreak. Hala ere, goi-mailako ikasketak behar dituzten adar hauetako eskaintza kualifikatuagoak ere izan dira: kontabilitatea, finantzak, fakturazioa, gizarteratzea edo gizarte-lana.

Silvia Fernández de las Heras eta Pedro de la Torre gure erakundeko enplegu teknikarien arabera, 2024ko zifrak “positiboak eta 2023koen antzekoak dira, baina zertxobait baxuagoak”.

Lan gehienak aldi baterakoak dira; izan ere, 46 kontratu horietatik 5 bakarrik izan dira mugagabeak; “Fekoorrek aukera-berdintasuna bultzatzeko egiten dituen ekintza positiboen eta orientazioaren emaitza da hori”.

Era berean, Bizkaiko erakundeak 206 pertsona lagundu eta artatu ditu ekintzetan, eta 56 pertsona berriri eman die alta (32 gizon eta 24 emakume). Horrenbestez, enplegu-poltsak 2.914 pertsona ditu dagoeneko (1.829 gizon eta 1.085 emakume), lan-egoera desberdinetan (langabeak, jardunean daudenak edo enplegua hobetu nahi dutenak).

Kontratazio mugagabearen aldeko apustua

Fekoorrekin elkarlanean ari diren enpresek “desgaitasuna duten pertsonak kontratatzearen alde egiten jarraitzen dute, lan-ingurune inklusiboagoak sortzeko, eta baita beren plantilletan sartzen diren pertsonen kontratazio mugagabearen, egonkortasunaren eta bizi-kalitatearen alde ere”. Horrela, aurtengo lehen sei hilabeteetan 5 kontratazio mugagabe lortu dira, horietatik 2 emakumeei dagozkie eta 3 gizonei.

Gainera, enpresekin egindako lanaren ildoan, 134 enpresarekin jarri gara harremanetan aholkatu egin ditugu eta sentsibilizatu egin ditugu, eta 83 eskaintza lortu dira. Horietatik, kolektiborako enplegagarritasun onena duten sektoreetako 112 lanpostu bideratu dira (garbiketa, administrazio-jarduerak eta zerbitzu osagarriak, merkataritza, garraioa, logistika…).

Enpresetan desgaitasuna duten langileak egotea “funtsezko adierazlea da desgaitasunak gizartean duen normalizazioa neurtzeko”. Hala ere, gaur egun, “ordezkaritza txikia dute” enpresa-ingurune arruntean, kolektiboarentzako enplegu gehiena eremu babestuan sortzen baita, hau da, Enplegu Zentro Berezietan.