30 Nov Zamudioko maila handiko padel eguna asteburuan
Fekoor-Bizkaia Aulkiko Padel Openak berriro bihurtu du Zamudio Estatuko aulkiko padelaren erdiguneetako bat. Hiru egunez, Padel Bizkaia Klubak giro berezia izan du: gertutasuna, kiroltasuna, lehiakortasun sanoa eta lehen momentutik kutsatzen den elkarrekiko errespetua. Estatuko 16 bikotek parte hartu dute, eta edizio ikusgarria eskaini dute, maila handiko jokoarekin eta pistan zein kanpoan energia positibo bereziarekin.
Final ikusgarria: Pérez eta Chamizo, txapeldunak
Fernando Pérez eta Roberto Chamizok denboraldiko partidarik onena jokatu zuten eta txapeldun izan ziren Edorta de Anta eta Luis Peinadori 6/4 eta 7/6 irabazita. Zalantzarik gabe, asteburuko partidarik zirraragarriena izan zen.
Estatuko hainbat txapelketetan finaletan parte hartu ondoren, bikotea une gozoan iritsi zen Zamudiora, eta maila bikaina erakutsi zuten. Une erabakigarrietan nagusi izan ziren eta bigarren seteko presioa gaindituta, garaipena euren joko sendoari esker ziurtatu zuten.
Hirugarren postua: Laslaa eta Agea
Hirugarren eta laugarren postuen arteko lehia ere maila handikoa izan zen. Mimoun Laslaa eta Óscar Ageak 6/4 eta 6/4 irabazi zieten Fekoorko Juanan López eta Aitor Elorduiri, denboraldi bikaina osatuz.
Kontsolazio finala: Velasco eta De Diego
Kontsolazio finalak erritmo handiko puntuak eta jokoa eskaini zituen. Rubén de Diego eta Andoni Velascok (Fekoor) sendotasunez irabazi zieten Mauro Alcalde eta Sergio Martín bikoteei: 6/1 eta 6/2.
Torneo bat baino gehiago
Open honek badu bere magia: pertsona bakoitzak bere historia dakar, baina pilota mugitzen hasten denean kirola da nagusi. Pistan, lehiakortasuna eta errespetua. Kanpoan, berriz, lagunartea, berriketaldiak eta urteko hitzordu berezi bat partekatzeko aukera.
Eskerrak
Urtero bezala, eskerrik beroenak Padel Bizkaia Klubari, etxean bezala hartzeagatik eta bere profesionaltasunagatik.
Eskerrak eman nahi dizkiegu baita ere: Epaileari (Sonia Macías), boluntarioei, Fekoorko staffari, fisioterapeutei, komunikazio taldeari eta antolakuntzan aritu diren profesional guztiei.
Eta, jakina, gure babesleei eta laguntzaileei: Bizkaiko Foru Aldundia, Clyma, BTRavel, Eroski, Ausolan, Klinika Pascual Physis, Servace eta ONCE Fundazioa.
Sari banaketan honako hauek parte hartu zuten: Javier Gil, Fekoor-eko zuzendaria; Carlos Sergio, Bizkaiko Foru Aldundiko Kirol zuzendaria; Javier Aguirre, Padel Bizkaia Klubeko arduraduna; Javier Fernández del Caño, Bizkaiko Padel Federazioko presidentea.