Desgaitasun Fisikoa eta/edo Organikoa duten Pertsonen Bizkaiko Federazio Koordinatzaileak (Fekoor) Desgaitasuna duten Pertsonen Nazioarteko Eguna ospatu du. Ekitaldiak belaunaldien arteko erreleboan jarri du arreta, elkarte-mugimenduaren “jarraipenaren bermea” baita.

“Diska Style” lelopean Barakaldoko BECen egindako aldarrikapen-ekitaldi batean, Serafin Iglesias erakundeko presidenteordeak desgaitasuna duten gazteek mugimenduaren buru izan behar dutela eta aurreko belaunaldien lekukoa hartu behar dutela azpimarratu du.

Horren harira, eragiten dieten erabakietan aktiboki parte hartzeko eskatu die. “Desgaitasuna duten gazteei zuzendu nahi natzaie bereziki: Ez egonean egon. Ez zaitezte konformatu beste pertsona batzuek erabakitzen dituzten politiken hartzaile izatearekin. Zuen iritzia garrantzitsua da. Zuen energiak axola du. Zuen ahotsak axola du ”, adierazi du Iglesiasek.

Presidenteordeak Zaragozako Adierazpeneko (Desgaitasuna duten Gazteen I. Estatu Kongresua) konpromisoa gogorarazi du, eta belaunaldi berrien protagonismo-eskaria artikulatu du: “Antolatu zuen ahotsa, eskatu zuen lekua, parte hartu. Ez da mesedea, eskubidea baizik”.

Protagonismo horren eskakizuna helburu batean oinarritzen da: bizitza beteak lortzea baldintza berdinetan. “Ez dugu gizarte paralelorik edo leku bereizirik nahi. Gure bizitza komunitatean egin nahi dugu, bizimodu independenteak nahi ditugu, guk geuk aukeratutako bizitzak. Edozein pertsonari dagokiona, ez gehiago ez gutxiago”, nabarmendu zuen.

Ekitaldian, Fekoorrek omenaldia egin die duela gutxi hil diren erakundeko funtsezko bi pertsonei: Juan Carlos Sola, 28 urtez erakundearen zuzendari izan zena, eta Mari Carmen Azcona, Zuzendaritza Batzordeko kidea, APDISAko presidenteordea eta Federazioko Berdintasunaren aldeko Emakumeen Batzordearen sustatzailea.

2025eko Fekoor Bizimodu Independentea saria

Erakundeak,aurten, Paula Belén Blasco Palacio doktoreari eman dio Fekoor Bizimodu Independentea saria, Basurtuko Unibertsitate Ospitaleko oftalmologo, Erretinako Distrofia Hereditarioen Unitateko arduradunari eta Damborenea Klinika Oftalmologikoan erretina mediko-kirurgikoan eta kataratan espezialistari. 

Horrela, Fekoorrek bere “ibilbide eredugarria eta esparru klinikotik harago doan konpromiso humanista” aitortu nahi izan du. Blasco Palacio doktorea saritu dute ikusmen-desgaitasuna duten pazienteen hezkuntza-, gizarte- eta komunitate-inklusioan duen ikuspegiagatik.

Ekitaldian 300 pertsona inguru izan dira, bazkideak, 21 elkarteetako kideak eta ordezkari politiko eta instituzionalak, horien tartean Nerea Melgosa Ongizateko, Gazteriako eta Erronka Demografikoko sailburua eta Amaia Antxustegi Bizkaiko Gizarte Ekintzako foru-diputatua.