Bilboko Udalak aurrera egin du 2026-2030 aldirako Emakumeen eta Gizonen Berdintasunerako VI. Udal Planaren diseinuan, eta begirada askotarikoagoa eta irisgarriagoa txertatu du. Entzute aktiboko prozesu horretan, Fekoor, Desgaitasun Fisikoa eta/edo Organikoa duten Pertsonen Bizkaiko Federazioak, 18 ekarpen aurkeztu ditu guztira, “desgaitasun-arrazoiengatik emakumerik atzean geratuko ez dela” bermatzeko.

Berdintasun Sailak egindako azterketa teknikoaren ondoren, Udalak baieztatu du Fekoorrek “intersekzionalitate-printzipioa indartzeko lehentasunezkotzat” jotzen dituen proposamen horietako 12 onartu direla. Intersekzionalitate-printzipioaren  kontzeptuaren helburua da emakumeek bizi dituzten askotariko diskriminazioak nola gurutzatzen diren ulertzea eta horiei erantzun integrala ematea.

Izaskun Jiménez Fekoorreko Berdintasun teknikariarentzat, plan berrian txertatu den gauzarik “nabarmenetako” bat datuen bilketa hobetzen jarraitzea da. Erakundeak proposatuta, genero-adierazleen sistemak “estankoa izateari utziko dio desgaitasunaren aldagaia txertatzeko, eta, horri esker, Bilboko emakumeen egoeraren irudi errealagoa lortuko da, eta politika publiko askoz zehatzagoak eta eraginkorragoak diseinatuko dira”.

Arreta-protokoloak

Udalak Fekoorren proposamenekin duen konpromisoa Segurtasun eta Arreta Arloan ere islatzen da. Arreta-protokoloak zehazteko neurriak sartu dira, desgaitasuna duten indarkeria matxista jasandako emakume, neskato eta neska gazteek laguntza espezifikoak eta informazioa izan dezaten formatu irisgarrietan.

Era berean, udal-langileen prestakuntza indartuko da, profesionalek kolektibo horren “errealitateari buruzko ezagutza sakona izan dezaten”, “komunikazio gabeziak detektatzeko eta prebentzio- eta erreparazio-zerbitzuak erabat inklusiboak izango direla ziurtatzeko”.

Jimenezek nabarmendu duenez, Fekoorrek Plana egitean eskainitako laguntzari esker, desgaitasuna duten emakumeek “ahalduntze feministaren, segurtasunaren eta baliabideak eskuratzearen arloan dituzten behar espezifikoak ezagutaraziko dira”.