03 Oct ARGIAk arreta integrala eta estoma inguruko azala zaintzeko produktuen finantzaketa publikoa eskatu du Pertsona Ostomizatuen Munduko Egunean
Larunbat honetan, urriaren 3an, Pertsona Ostomizatuen Munduko Eguna ospatzen dela eta, Fekoorreko kide den ARGIA elkarteak osasun-arreta integrala, irisgarria eta kalitatezkoa eskatu du. Halaber, estoma inguruko azala zaintzeko produktu osasungarrien eskuragarritasuna eta finantzaketa publikoa bermatzea aldarrikatu du.
Ostomia bat esku-hartze kirurgiko bat da, barneko organo bat kanpoaldearekin lotzen duena estoma izeneko zulo baten bidez. Hortik kaka edo txiza ateratzen dira, eta gailu egokietan biltzen dira. Estomaren inguruko azalak zainketa espezifikoak behar ditu. Pertsona batzuei irritazioak, lesioak eta bestelako konplikazioak agertzen zaizkie, eta produktu gehigarriak behar izaten dira horiek saihesteko.
Pedro Lopategui ARGIAko bozeramailearen esanetan, gailu horiek “gastu handia eta jarraitua sartzen dute, batez ere horiek ordaintzeko baliabiderik ez dutenentzat”; horregatik, produktu horiek “tratamenduaren funtsezko zatitzat” hartzea eta beren eskuragarritasuna zein finantzaketa bermatuko dituzten mekanismoak aztertzea eskatzen dute.
“Eskuragarritasuna bermatzeak –gehitu du– pertsonek beren gain hartu ezin duten gastu baten artean aukeratu behar izatea edo beren osasunerako beharrezkoak diren zainketei uko egitea eragozten du”, ziurtatu du.
Egokitutako komunak Elkarteak eskerrak eman dizkie erakunde publiko zein pribatuei pertsona ostomizatuentzat egokitutako komunak jartzen aritzeagatik. Oraindik “nahikoak ez” direla aitortu du, baina pertsona askorentzat leku egoki, seguru eta higieniko bat izatea etxetik ateratzera ausartzea dakarrela nabarmendu du.
Gaurko eguna markatzeko, ARGIAk informazio-mahaiak jarriko ditu Intermodaleko Zabalgunean (bertan Zuzendari Batzordeko kideak egongo dira) eta Indautxu plazan, 10:00etatik 14:00etara.
Espainian 200.000 pertsona ostomizatu inguru daude, horietatik 8.000 Euskadin eta 5.000 Bizkaian. Argiako bozeramaileak dioenez, “ostomia batek ez du muga bat izan behar. Zainketa egokiekin, informazioarekin, babesarekin, baliabideekin eta gero eta irisgarriagoa den gizarte batekin, pertsona ostomizatuek beren bizi-proiektuak askatasunez eta normaltasunez garatzen jarrai dezakete”.